Pakistan  |  International  |  Business  |  Sports  |  Showbiz  |  Technology  |  Health  |  Wonder  |  Weather  |  Columns

’رنبیر اور رنویر دونوں ہی میرے لیے بہت خاص ہیں‘

بولی وڈ اداکارہ عالیہ بھٹ اور اداکار رنبیر کپور کے افیئر کے اس وقت خوب چرچے ہورہے ہیں اور ان کے مداح دونوں کی بھی جلد شادی ہونے کا انتظار کررہے ہیں۔

عالیہ بھٹ اس وقت جہاں بھی جاتی ہیں، ان سے رنبیر کپور کے حوالے سے سوالات ضرور پوچھے جاتے ہیں۔

اور ایسا ہی کچھ ان کی آنے والی فلم ’گلی بوائے‘ کے ٹریلر لانچ کی تقریب کے دوران ہوا۔

عالیہ بھٹ اس موقع پر ساتھی اداکار رنویر سنگھ کے ساتھ موجود تھیں۔

مزید پڑھیں: رنبیر اور عالیہ کی شادی 2020 میں متوقع

یاد رہے کہ رنویر سنگھ بھی گزشتہ سال گرل فرینڈ اور اداکارہ دپیکا پڈوکون کے ساتھ شادی کے بندھن میں بندھ گئے اور کیریئر کے شروع سے ہی رنویر سنگھ اور رنبیر کپور کو ایک دوسرے کے بہت زیادہ مدمقابل رکھا گیا ہے۔

اس کی ایک وجہ دپیکا پڈوکون بھی ہیں، جن کا کیریئر کے آغاز میں رنبیر کپور کے ساتھ بھی تعلق رہ چکا ہے۔

’گلی بوائے‘ کے ٹریلر لانچ کی تقریب کے دوران بھی عالیہ بھٹ سے رنویر سنگھ اور رنبیر کپور کے حوالے سے سوالات پوچھے گئے۔

اس موقع پر ایک رپورٹر نے عالیہ سے سوال کیا کہ رنبیر کپور اور رنویر سنگھ ایک دوسرے سے کتنی مماثلت رکھتے ہیں اور ان دونوں میں کون سی باتیں الگ ہیں۔

اس پر عالیہ بھٹ نے کہا کہ ’ان دونوں میں بہت سی چیزیں مشترکہ ہیں، دونوں بہت اچھے انسان ہیں، بہترین اداکار ہیں، اور دونوں میرے لیے بہت خاص ہیں‘۔

اداکارہ نے مزید کہا کہ ’الگ بس یہی ہوگا کہ ایک کے ساتھ میں براہمسٹرا میں کام کررہی ہوں جبکہ دوسرے کے ساتھ میں گلی بوائے میں کام کررہی ہوں‘۔

مزید پڑھیں: عالیہ، رنبیر اور رنویر کے بعد دپیکا اور کترینہ کیساتھ فلم کرنے کی خواہاں

اس جواب کے بعد ساتھ موجود اداکار رنویر سنگھ نے عالیہ کا مذاق اڑاتے ہوئے کہا کہ ’ایک تھوڑا زیادہ خاص ہے اور ایک تھوڑا کم‘۔

جس پر عالیہ نے شرماتے ہوئے رنویر سنگھ کو مار کر خاموش رہنے کو کہا۔

یاد رہے کہ رپورٹس ہیں کہ عالیہ بھٹ اور رنبیر کپور بھی جلد شادی کے بندھن میں بندھ جائیں گے۔

یہ بھی پڑھیں: رنویر سنگھ ’گلی بوائے‘ کیوں بنے؟

یہ دونوں اس وقت اپنی فلم ’براہمسٹرا‘ کی شوٹنگ میں مصروف ہیں جو رواں سال ریلیز ہوگی۔

عالیہ بھٹ اور رنویر سنگھ کی فلم ’گلی بوائے‘ کے ٹریلر کو بھی خوب پسند کیا جارہا ہے، یہ رواں سال 14 فروری کو سینما گھروں میں نمائش کے لیے پیش کی جائے گی۔


News Source

’رنبیر اور رنویر دونوں ہی میرے لیے بہت خاص ہیں‘

شناختی عنوان:,

تبصرہ کریں