Pakistan  |  International  |  Business  |  Sports  |  Showbiz  |  Technology  |  Health  |  Wonder  |  Weather  |  Columns

پیرس کے تاریخی گرجاگھر نوٹرڈیم میں شدید آتش زدگی

پیرس میں واقع تاریخی گرجا گھر نوٹرڈیم میں اچانک بڑے پیمانے پر آگ بھڑک اٹھی جس سے اس قدیم عمارت اور سیاحت کے ایک اہم مرکز کو شدید نقصان پہنچا۔

سوشل میڈیا پر پوسٹ ہونے والی ویڈیوز میں نوٹرڈیم کی مخروطی چوٹی شعلوں میں گھری ہوئی نظر آ رہی ہے اور آگ کے شعلے اور دھواں چھت سے اوپر اٹھ رہا ہے۔ آگ کی شدت سے گرجا گھر کی مخروطی چوٹی جل کر گر گئی۔

پیرس کی میئر این ہیدالگو نے کہا ہے کہ فائر فائٹرز خوفناک آگ پر قابو پانے کی کوشش کر رہے ہیں۔

آگ لگنے کی وجہ کا فی الحال پتا نہیں چل سکا۔

فرانسیسی میڈیا کی رپورٹس میں کہا گیا ہے کہ آگ بجھانے کے عہدے داروں نے کہا ہے کہ زیادہ تر امکان یہ ہے کہ آگ بھڑکنے کا تعلق گرجا گھر کی تزئین و آرائش کے کام سے ہے۔

ان دنوں گرجا گھر کی تزئین و آرائش اور مرمت کا کام ہو رہا ہے۔

عہدے داروں نے بتایا کہ گرجا گھر کے کئی حصوں میں مرمت اور تزئین و آرائش کے لیے مچانیں کھڑی گئی ہیں اور پچھلے ہفتے کانسی کے مجمسوں کو اس مقصد کے لیے وہاں سے ہٹایا گیا ہے۔

نوٹرڈیم میں شدید آتش زدگی کے باعث صدر ایمنوئل میکرون نے قوم سے اپنے ٹیلی وژن خطاب کو ملتوی کر دیا ہے۔

امریکی صدر ڈونلڈ ٹرمپ نے اپنے ایک ٹوئٹ میں کہا ہے کہ پیرس میں نوٹرڈیم پر شدید آتش زدگی کا منظر بہت خوفناک ہے۔ شاید اس کے لیے فلانئگ واٹر ٹینکر استعمال کیے جا سکتے ہیں۔ اس پر تیزی سے عمل کرنا چاہیے۔

قرون وسطیٰ کے دور سے تعلق رکھنے والا یہ کیتھولک کیتھڈرل یورپ میں سیاحت کے سب سے بڑے مراکز میں شامل ہے جسے بڑی تعداد میں لوگ دیکھنے کے لیے آتے ہیں۔

اس کیتھڈرل کا تعلق 12 صدی عیسوی سے ہے۔


News Source

پیرس کے تاریخی گرجاگھر نوٹرڈیم میں شدید آتش زدگی