Pakistan  |  International  |  Business  |  Sports  |  Showbiz  |  Technology  |  Health  |  Wonder  |  Weather  |  Columns

بار بار دھوئے جانے کے قابل، بیٹری کے بغیر برقی لباس تیار

کوریائی ماہرین نے لباس کو ڈسپلے بنانے والے ایسے ریشے بنائے ہیں جو بیٹری کی ضرورت ختم کردیتے ہیں ساتھ ہی بار بار دھونے سے برقی لباس خراب نہیں ہوتا۔ فوٹو: کے اے آئی ایس ٹی

کوریائی ماہرین نے لباس کو ڈسپلے بنانے والے ایسے ریشے بنائے ہیں جو بیٹری کی ضرورت ختم کردیتے ہیں ساتھ ہی بار بار دھونے سے برقی لباس خراب نہیں ہوتا۔ فوٹو: کے اے آئی ایس ٹی

جنوبی کوریا: دنیا بھر میں برقی کپڑوں (الیکٹرانک ویئریبلز) لباس کی تیاری زوروشور سے جاری ہے۔ لیکن ایک جانب تو مسلسل بجلی فراہم کرنا مشکل ہوتا ہے تو دوسری جانب انہیں دھونا محال ہوتا ہے۔ یہ دونوں مسائل اب کوریائی ماہرین نے حل کردیئے ہیں۔

برقی ڈسپلے والے لباس کو دھونے کی سہولت نہ ہونے سے ان کی تجارتی قدر صفر ہوجاتی ہے اور یہی وجہ ہے کہ یہ لباس اب بھی تجربہ گاہوں سے باہر نکل کر دکانوں تک نہیں پہنچ سکے ہیں۔

دی کوریا ایڈوانسڈ انسٹی ٹیوٹ آف سائنس اینڈ ٹیکنالوجی (کے اے آئی ایس ٹی) کے ماہرین نے ایسا برقی لباس بنایا ہے جسے چلانے کے لیے باہر سے توانائی دینے کی ضرورت نہیں ہوتی اور اسے بار بار دھوکر کئی بار پہنا جاسکتا ہے۔

پروفیسر کیونگ کیول اور ان کی ٹیم نے برقی ڈسپلے والا ایک لباس بنایاہے جس میں اصل کپڑے کا ریشہ اور ساتھ میں پالیمر(مصنوعی ریشے) سے بنے شمسی (سولر) سیل استعمال کئے ہیں اور ڈسپلے لیے لیے آرگینک لائٹ ایمیٹنگ ڈائیوڈ (اوایل ای ڈی) لگائی گئی ہیں۔

اوایل ای ڈی جو توانائی استعمال کرتی ہیں وہ ملی واٹ میں ہیں اور اس لیے شمسی سیل کے دھاگوں سے آنے والی بجلی ان کے لیے بہت کافی ہوتی ہے۔ تاہم یہ نظام نمی سے شدید متاثر ہوکر بے کار ہوسکتا ہے یعنی ہلکی سی نمی لباس کے پورے الیکٹرانک کو شارٹ سرکٹ کرکے تباہ کرسکتی ہے۔

ماہرین نے اس کمی کو دور کرنے کے لے اٹامک لیئر ڈیپوزیشن (اے ایل ڈی) اور اسپن کوٹنگ جیسے جدید طریقے اپنائے ہیں۔ اس طرح سے پورے نظام پر ایک طرح کی واٹرپروف تہہ چڑھ جاتی ہے اور اب لباس کو 20 مرتبہ بھی دھویا جائے تب بھی اس کی اوایل ای ڈی اور برقی نظام خراب نہیں ہوتا۔

تجربات میں لباس کو بار بار موڑا اور نچوڑا بھی گیا لیکن الیکٹرانک نظام پر کوئی خاص فرق نہیں پڑا۔ دوسری جانب اس لباس سے بیرونی بیٹری کا بار بار چارجنگ کی کوئی ضرورت نہیں رہتی اور شمسی ریشوں سے یہ اپنے استعمال کی بجلی لیتا رہتا ہے۔


News Source

بار بار دھوئے جانے کے قابل، بیٹری کے بغیر برقی لباس تیار